2Pe 2 | MMX | STEP | Luvuttadi vapaase alii xaxarang diga ravasu gano xeneng at limixin me Israel, la lavaeme loklox ase xaxarang bok, dinaba ravasu xa maxeneng atnemi. La dinaba lox abeles nemnem levenanasa xaxarang kusu ri lox asubu lunuunu atnimi. Dinaba sok tixirixes Leeme Silok mo ga un kaka amlong nedi, kuren la nedi xa dinaba ekip tangarang soso mi labaava.

aLer 26:11

2 Peter 2

Leveloklox Ase Xaxarang

1 Luvuttadi vapaase alii xaxarang diga ravasu gano xeneng at limixin me Israel, la lavaeme loklox ase xaxarang bok, dinaba ravasu xa maxeneng atnemi. La dinaba lox abeles nemnem levenanasa xaxarang kusu ri lox asubu lunuunu atnimi. Dinaba sok tixirixes Leeme Silok mo ga un kaka amlong nedi, kuren la nedi xa dinaba ekip tangarang soso mi labaava. 2 La buaang atnimi minaba mu asu leveloklox ase xaxarang atdi, la laxakapmek atnedi maxamang at lixitkis epot; kuren la mumu mun mo leveloklok atnedi, limixin maxamang at lotu dinaba vaase kapmek ti langas at luruturun. 3 La loklok ti belegaao bok at na lavaeme loklox ase xaxarang naba silok la dinaba lok ka lempilas atnimi mi leventetere xaxarang diga doxoma xaka i. La at laxanaleng buaang, ne Moroa ira gagas pam kusu na lok li lumumuat atdi la naba sele utut nedi.

Moroa Naba Vorang Laxakapmek At Limixin

4 Kerepmo ne Moroa goxo ke atnaasan lubungangelo diga lok laxapmek, ketla neni ga lu arup midi to at lemenemen songsongot, la dik lok keneng at loxokoxo at lamain, la diba nemen go se at laaleng ete. 5 La kerepmo bok ne Moroa goxo ke atnaasan bok lavatbung menemen gano, neni ga lox asu laran ti limixin di goxo mu asu lodoxoma ren; la neni ga lox aroo xusuk mun ne Noa, neni laradi ga vavang mumu loklok mokmokso, la eburu bok mi lavanuti leventaba luvuttadi. 6 I lok ngan bok pam ne Moroa ga sele utut bok lumenemen silok to Sodom la Gomora mi laxao; la neni ga lox i na ngan ni lampoovo ri lavanga salai naba vot atnedi dixo mumu asu lodoxoma ren. 7 Neni ga lox aroo asu laradi mokmokso ne Lot, la neni laradi gak bulu aleng mumu lorooro bilinga at limixin to Sodom la Gomora di goxo mumu asu levelinga at ne Moroa. 8 Mo laradi avukat gak lox eburu minedi, at laxanaleng axap; la neni gang songot mi lanbulu at levenaleng neni ga reven i la gang tonga leveloklok kakapmek atnedi. 9 Kuren la Leeme Silok ne Moroa i epovo ri lox asepsu limixin avukat basinge levesongsongot, la i epovo bok kusu na lok li limixin tongtonga xepe ro xeneng at loxokoxo la na lox asongot nedi se at laaleng ete. 10 Naba lok tinotno xuren tinedi di mumu asu levendoxoma xapmek at labantuxu la ding tonga xepe levelinga at ne Moroa.

Loklok At Lavaeme Loklox Ase Xaxarang

La nedi na lavaeme loklox ase xaxarang, di abelemes tinotno la dik lox asilok di, la dixok lox asu loklok ngangao atnedi ri limixin di nemen to vana at laxalibet, ketla di paase xapmek mumu di. 11 Ketla lubung angelo di ruuna lololos polo nedi na lavaeme loklox ase xaxarang, dixo babala raba na lavaeme loklox ase xaxarang at lemeren Leeme Silok. 12 Ketla ana limixin, di tu eburu xusu ri paase xapmek mumu limixin keneng at levempanga nedi dixokleklen i, la dip tuvuk baulang ngan levempanga aaxa mi lavanuet kangkedek atnedi; lugugu mun atnedi keretna, diga visik mun di xusu dinabak lox alis kaka di la dinap sev amet nedi; la dinaba seeve ngan laxampanga aaxa mi lavanuet kangkedek atnedi.

13 La ne Moroa naba vorang nedi mi losongsongot mumu levesongsongot nedi diga raba limixin min. La dik lox amomo nedi xeretna, dik lok levempanga at laxasep at laaleng kangking kusu rik lox epovo lavavara xapmek at labantuxu atnedi; la loklok atdi ik token kantubu atnemi la di mumu asu loklok kakapmek at levenaleng di anan eburu minemi. 14 Di vavara xusuk mun i xusu dinak lok mu lavakin dik lok lengkot kapmek; la levempavara atnedi rik lok leveloklok kakapmek, kopmen na vaxap. La di sasat kaka limixin, lunuunu atdi xopmen na lolos, kusu dina lok laxapmek. La dik lok arala levempeve atnedi mi loklok ti belegaao. Kuren la nedi dik lok maxopok at lasaxaek ne Moroa naba raba di min! 15 Kerepmo diga on basinge langas lom la dirat pas soogong gamasa nga; dira mumu asu nga langas no ne Balam ne nitna ne Beo ga mumu i, neni ga vavara solo i xusu neni nak lok laxapmek kusu neni nabak lok kaka levempilas. 16 Ketla ne Moroa ga musax i xusu laxapmek teren. Kuren la lodongki goxo epovo ri paase, ketla ga ba gili laxaka ren ngan laradi la ga vaase rin kusu na xav i at loklok tangtangku.

17 Nedi na limixin di lok ngan laraasa mes, la di lok ngan bok lengkon takabu lamanman takabu it mas kepe i. Ne Moroa gara lok li agagas pam loxot tidi ro xeneng tinotno at lamain bonot. 18 Dim simi aurut nedi mi levendoxoma rangtangku la levelinga gamasa. La dik lok lengkot mamangan kusu dinang kan kaka nedi dik lok do dinak sixiro basinge limixin di mumu asu langas kapmek. 19 Di tong taba limixin do dinaba sepmus basinge Lenavolo, ketla nedi xa, di nemen at loxokoxo at laxakapmek mila limixin kerepmo di nemen ngan lavasaxaruki maxopok at lempanga salai imgomgo ridi. 20 Amo dola limixin digara sixiro vam at laxapmek at lavatbung menemen mumu lakleklen atnedi xeneng at Leeme Silok atnedik, la Laradi Loklox Arooro ne Iesu Karisito; la melemu, nedi diramlong mu manga loklok me gano. Nedi na limixin dik lok keretna, dik lok tinotno xeneng at loxot kapmek aleng la i lok kapmek tinotno ri no lorooro xapmek avot nedi digak lok teren. 21 Gitaba lox avukat tinotno rinedi xusu di gitoxoklen langas at lomokmokso; la i lok kapmek tinotno mila di garaklen pam i la melemu diga repukus basinge manga mo levelinga xaala ne Moroa ga raba nedi min. 22 La lavanga nedi dik lox i, i lox asorun leventetere avolo, i lok keretna,

“Laman imlomlong kusu na anan laxan biromto ren.” ^a

La bok,

“Lobo do ira susu avukat pam, irat pas bok la ira soe i ro xeneng at lapke.”